ნინო გიგაური, მასწავლებელი გორიდან, ბუნებასთან ყოველთვის განსაკუთრებულ კავშირს გრძნობდა. მას ძალიან უყვარს ხატვა და საკუთარი ხელით ნივთების შექმნა. შემოქმედება მისთვის თვითგამოხატვის საუკეთესო საშუალებაა. სწორედ ამ ინტერესმა და სიახლეების ძიებამ სრულიად მოულოდნელ საქმემდე მიიყვანა: მან ლავანდის საკუთარი მეურნეობა გააშენა.
ეს ჩემთვის საშუალება იყო, მეკეთებინა ის, რაც მიყვარს და ჩემი სათქმელი ხელოვნების ენით გადმომეცა, — იხსენებს ნინო.
პირველი ნაბიჯები
ნინომ აღმოაჩინა, რომ ლავანდაზე მოთხოვნა დიდია, თუმცა ეთერზეთები საქართველოში მცირე რაოდენობით იწარმოება და ძირითადად იმპორტირებულია. მან EU4Dialogue-ის საგრანტო პროგრამის მხარდაჭერით 300 ძირი ლავანდა დარგო და ეთერზეთებისგან ეკოლოგიურად სუფთა სანთლებისა და საპნების წარმოება დაიწყო, რომლებსაც ახლა ონლაინ ყიდის.
EU4Dialogue: კონფლიქტის ტრანსფორმაციის მხარდაჭერა სამხრეთ კავკასიასა და მოლდოვას რესპუბლიკაში — ევროკავშირისა და გაეროს განვითარების პროგრამის (UNDP) ერთობლივი ინიციატივაა. პროექტი მიზნად ისახავს დიალოგის ხელშეწყობას, ხალხთა შორის კონტაქტების აღდგენასა და კონფლიქტის შედეგად დაზარალებული თემების ცხოვრების დონის გაუმჯობესებას. პროგრამა, რომელიც EU4Business-ის ეგიდით 2025 წლის მაისში დასრულდა, რეგიონში გენდერულ თანასწორობასა და ახალგაზრდებისთვის უკეთესი მომავლის შექმნას უწყობდა ხელს.
პროექტი ადგილობრივი ინიციატივებისთვის გრანტებს გასცემდა და სთავაზობდა მოქნილ მექანიზმებს გადაუდებელი საჭიროებების მოსაგვარებლად. ამასთანავე, ტრენინგებისა და ცოდნის გაზიარების გზით, ის სამოქალაქო საზოგადოების გაძლიერებაზე ზრუნავდა. ნინო გიგაურისთვის სასწავლო კომპონენტი ისეთივე ღირებული აღმოჩნდა, როგორც ფინანსური დახმარება. პროგრამის ფარგლებში მან ბევრი ქალი მეწარმე გაიცნო და მათთან ერთად გამოცდილება და საუკეთესო პრაქტიკა გაიზიარა.
ცნობიერების ამაღლების ტრენინგებმა ჩემს თავდაჯერებულობაზე ძალიან იმოქმედა, — ამბობს ნინო. — ისეთი მოტივირებული ვარ, ახლა წინ ვეღარაფერი დამიდგება.
დიდი გეგმები
სოფელი ლამისყანა, სადაც ნინო გიგაურის ლავანდის პლანტაციაა გაშენებული, კასპის რაიონის უკიდურეს სამხრეთში მდებარეობს. ის ესაზღვრება სოფელ ახმაჯს, რომელიც 2008 წლის ომის შემდეგ რუსეთის მიერაა ოკუპირებული.
ლამისყანა ისტორიული სოფელია. სწორედ აქ, ჯამბაკურ-ორბელიანების სასახლის ბიბლიოთეკაში, 1913 წელს ივანე ჯავახიშვილმა ქართლის ცხოვრების უძველესი ხელნაწერი აღმოაჩინა. ეს სასახლე ადგილობრივებისთვის, მათ შორის ნინოსთვისაც, ტურისტულ პერსპექტივებს აჩენს.
ნინო გეგმავს, თავისი ერთჰექტარიანი ნაკვეთი სრულად აითვისოს და ლავანდის მეურნეობა გააფართოოს. მისი ოცნებაა, იქვე პატარა, ეკომეგობრული ხის კოტეჯი ჩადგას, სადაც სტუმრებს სანთლების დამზადების მასტერკლასებს ჩაუტარებს.
ჩემი მიზანია, შევქმნა გამორჩეული და ხელმისაწვდომი ბრენდი, რომელიც მომხმარებელს დიდხანს ემახსოვრება, — ამბობს ნინო.
ნინო გიგაური ერთ-ერთია იმ მრავალ მეწარმეს შორის, რომლებმაც მხარდაჭერა მიიღეს. მხოლოდ 2024 წელს, EU4Business-მა საქართველოში 40,801 მცირე და საშუალო საწარმოს დაუჭირა მხარი. მეტი ინფორმაციისთვის შეგიძლიათ ეწვიოთ პროგრამის ვებგვერდს.
